काठमाडौं,२ पुस। नेकपा माओवादी केन्द्रले पार्टी प्रवेश गर्नेलाई पहिलेको पार्टीमा भएको पदअनुसार नै जिम्मेवारी दिने निर्णय गरेको छ । पार्टीले वाम एकतालाई बलियो बनाउने उद्देश्यले यस्तो निर्णय गरेको हो ।
पार्टीका एक स्थायी कमिटी सदस्यका अनुसार साङ्गठनिक जिम्मेवारी व्यवस्थापनमा उपेक्षा भएको भनी आएका गुनासोलाई सम्बोधन गर्न यो निर्णय गरिएको हो । अध्यक्ष पुष्पकमल दाहाल ‘प्रचण्ड’ र महासचिव देव गुरुङको हस्ताक्षरमा मातहतका कमिटीलाई यस सम्बन्धी सर्कुलर पठाइसकिएको छ ।
सर्कुलरमा भनिएको छ, ‘विगतमा एकीकरण/समायोजन/पार्टी प्रवेश भएका कतिपय कमरेडहरूको सन्दर्भमा साङ्गठनिक जिम्मेवारी व्यवस्थापनमा उपेक्षा भएको भनी आएका गुनासोलाई ध्यानमा राखी एकीकरण/समायोजन/प्रवेश हुँदाका बखत स्थापित बाम घटकहरूमा जुन जुन स्तरमा कार्यरत रहेको थियो सोही स्तरमा समायोजन गर्ने र गैर वाम घटकहरूबाट पार्टी प्रवेश हुँदा सम्बन्धित पार्टी समितिहरूको निर्णय अनुसार समायोजन गर्ने निश्चित गरिएको छ ।’
माओवादीले पार्टी प्रवेश गर्नेलाई पुरानै पद दिने निर्णयले पार्टीभित्र एकतालाई थप बलियो बनाउने अपेक्षा गरिएको छ । यसले पार्टीमा नयाँ ऊर्जा थप्ने र संगठन विस्तारमा सहयोग पुग्ने पार्टी नेताहरूको विश्वास छ ।
