सिन्ह्वा। पूर्वी चीनको जियाङ्सी प्रान्तस्थित युदु काउन्टीमा पर्ने पुरानो नदी किनारको घाट ७७ वर्षीय सुन गुआनफाको घरबाट करिब आधा घण्टाको पैदल दूरीमा छ। नौ दशकअघि उनका बुबा यही नदी किनारबाट चिनियाँ कम्युनिस्ट पार्टी (सीपीसी) को ऐतिहासिक ‘लङ मार्च’मा सामेल भएका थिए।
सन् १९३४ को अक्टोबरमा सीपीसीको नेतृत्वमा रहेको मुख्य लाल सेना (रेड आर्मी) का करिब ८६ हजार सिपाहीहरूले गृहयुद्ध र विदेशी आक्रमणको संकटबाट देशलाई मुक्त गर्ने लक्ष्यसहित युदु नदी तरेर यो ऐतिहासिक यात्रा प्रारम्भ गरेका थिए।
पारिवारिक बलिदानको जीवित इतिहास
युदुका स्थानीय बासिन्दाका लागि लङ मार्च इतिहासको पानामा मात्र सीमित छैन; यो उनीहरूको पारिवारिक स्मृति र बलिदानको प्रत्यक्ष अनुभव हो।
लङ मार्च प्रस्थान बिन्दु संग्रहालयकी व्याख्याता झोङ मिनका अनुसार, तत्कालीन समयमा युदुबाट मात्रै १७ हजारभन्दा बढी नागरिक सेनामा भर्ती भएर मोर्चामा हिँडेका थिए। तर, तीमध्ये केवल २७७ जना मात्र जीवित घर फर्किएका थिए।
”हामी अरू कसैको कथा सुनाइरहेका छैनौँ, आफ्नै पूर्वजहरूको बलिदानको कथा भनिरहेका छौँ,” झोङ भन्छिन्। उनका आफ्नै परिवारका सदस्यहरू पनि उक्त सङ्घर्षमा सहिद भएका थिए। यस्तै, सुनका पिता पनि सोही अभियानको भीषण युद्धमा मारिएका थिए।
करिब १२,५०० किलोमिटर लामो उक्त रणनीतिक सैन्य यात्रामा लाल सेनाले हिउँले ढाकिएका हिमाल, दलदल र शत्रुको घेराबन्दी पार गरेको थियो। यसै अभियानले नयाँ चीन स्थापनाको आधार तय गरेको मानिन्छ।
विगतको जगमा ‘आधुनिक समाजवाद’को यात्रा
उक्त ऐतिहासिक प्रस्थान बिन्दुको भ्रमणका क्रममा चिनियाँ राष्ट्रपति सी चिनफिङले लाल सेनाको स्मारकमा पुष्पगुच्छा अर्पण गर्दै यस स्थलको महत्त्वबारे प्रकाश पारेका थिए।
राष्ट्रपति सीले भनेका थिए, “हामी यहाँ लाल सेना कसरी अघि बढेको थियो भन्ने स्मरण गर्न आएका हौँ। आज हामी चौतर्फी रूपमा आधुनिक समाजवादी देश निर्माण गर्ने नयाँ लङ मार्चमा छौँ।”
ग्रामीण रूपान्तरण र आर्थिक समृद्धि
विगतमा स्थानीयहरूले काठका डुङ्गा र ढोकाका फल्याक जोडेर सेनाका लागि अस्थायी पुल बनाइदिएको युदु नदीमा आज पाँचवटा आधुनिक पक्की पुलहरू सञ्चालनमा छन्। विगतमा गरिबी र युद्धको विम्ब बनेको यो क्षेत्र अहिले ग्रामीण पुनरुत्थान र पर्यटनको नमुना बनेको छ।
सुन गुआनफा अहिले आफ्नो घरमा आउने पर्यटकहरूलाई स्थानीय चिया र परिकार बिक्री गर्छन्। उनी भन्छन्, “अहिले हाम्रो वार्षिक आम्दानी उल्लेख्य रूपमा बढेको छ र जीवनस्तरमा ठूलो सुधार आएको छ।”
विगतमा देशको स्वतन्त्रताका लागि पूर्वजहरूले गरेको त्यागको स्मरण गर्दै आज युदु क्षेत्र आधुनिकीकरण, आर्थिक विकास र समृद्धिको नयाँ यात्रामा अघि बढिरहेको छ।
