पोखरा। भारतको ओडिसा राज्यको बालासोर जिल्लामा गएराति यात्रुबाहक रेल दुर्घटना भएको छ। चेन्नाइबाट हाउडाको लागि प्रस्थान गरेको कोरोमंडल एक्सप्रेस ट्रेन एक मालबाहक गाडीसँग ठोक्किँदा दुर्घटना भएको बताइएको छ ।उक्त रेल दुर्घटनामा मृत्यु हुनेको संख्या २ सय ३३ पुगेको छ । यस्तै ९ सय जना जति घाइते भएको अनुमान गरिएको एजेन्सीले जनाएको छ ।
दुर्घटना पश्चात् भारतका रेल मन्त्री अश्विनी वैष्णव आफै दुर्घटना क्षेत्रमा पुगेका थिए । उनले ट्वीट गर्दै घटनाप्रति दुःख व्यक्त गरेका छन्। साथै मृत्यु भएका व्यक्तिका परिवारलाई प्रतिपरिवार १० लाख रुपैयाँ दिने घोषणा गरेका छन् ।
यस्तै गम्भीर घाइते भएकाहरूलाई २ लाख रुपैयाँ तथा सामान्य घाइते भएकाहरूलाई ५० हजार रुपैयाँ प्रदान गर्ने उनले बताएका छन् ।
दुर्घटनामा घाइते भएका १ सय ३२ यात्रीको गोपालपुरको एक अस्पतालमा उपचार भइरहेको छ भने थप ४७ घाइतेलाई बालासोरका मेडिकल कलेजमा भर्ना गरिएको छ। ओडिसाका मुख्य सचिव प्रदीप जेनाको भनाइलाई उद्धृत गर्दै समचार श्रोतहरुले लेखेको छ ।
