काठमाडौं। उपेन्द्र यादव नेतृत्वको जनता समाजवादी पार्टी नेपालबाट विभाजित भएर बनेको अशोक राई नेतृत्वको जनता समाजवादी पार्टी निर्वाचन आयोगमा विधिवत दर्ता भएको छ ।
आयोगको सोमबार बसेको बैठकले राई नेतृत्वको नयाँ दललाई सोमबार वैधता दिएको हो । आयोगका सहायक प्रवक्ता रामदत्त पाण्डेयले नयाँ दल दर्ता भएको जानकारी दिए । राईसहित ७ सांसदले आइतबार नयाँ दल दर्ताका लागि आयोगमा निवेदन दिएका थिए ।
राजनीतिक दलसम्बन्धी ऐन–२०७३, राजनीतिक दलसम्बन्धी नियमावली–२०७४ र प्रचलित संघीय कानून बमोजिमका कानूनी प्रावधानअनुसार नयाँ दल दर्ता भएको सहायक प्रवक्ता पाण्डेयले बताए ।
‘जनता समाजवादी पार्टी (जनता समाजवादी) नामक राजनीतिक दल दर्ता गरी आयोगको दल दर्ता किताबमा अभिलेखीकरण गर्ने निर्णय भएको छ,’ पाण्डेयले भने ।
उनका अनुसार नयाँ दलबारे आयोगले संघीय संसद सचिवालय, सबै प्रदेश तथा जिल्ला निर्वाचन कार्यालय र उपेन्द्र यादव नेतृत्वको जसपा नेपाललाई विवरण लेखी पठाउने छ ।
पोखरा हव प्रा.लि. द्वारा प्रकाशित | पोखरा प्रेस डटकमसूचना विभाग दर्ता नं.: २३९६/०७७-०७८
Copyright © All right reserved to pokharapress.com Site By: SobizTrend.
