गोरखा २१ जेठ। सिद्धाश्रम शक्ति केन्द्रको आयोजनामा भएको ११ दिने सवालाख रोट महोत्सव सफलतापूर्बक सम्पन्न भएको छ ।
महोत्सव ५० हजार भन्दा बढी भक्तजनहरुले अवलोकन गरेको आयोजकले जनाएको छ । महोत्सवमा चितवन, काठमाडौ, सिन्धुली, जनकपुर, सर्लाही, विराटनगर लगायतका जिल्लाबाट भक्तजनहरु आएको सिद्धाश्रम शक्ति केन्द्रका राम्जी अर्यालले जानकारी दिए ।
महोत्सवमा एक लाख ६७ हजार ९ सय ४५ रोट गोरखनाथलाई अर्पण गरिएको उनले बताए । ११ दिन सम्म चलेको महोत्सवमा संचालनका लागि २५ लाख भन्दा बढी रकम खर्च भएको पनि उनले बताए ।
‘वर्षै पिच्छे भक्तजनको संख्या वढेको छ, यो वर्ष शुरुको दिन देखि नै भक्तजनको उपस्थिति उल्लेखनीय रहेको थियो,’ उनले भने । महोत्सवले धार्मीक पर्यटकको संभावनालाई उजागर गरेको उनले बताए । महोत्सव अवधि भर प्रत्येक दिन विशेष पुजा, हवन, स्तुतिवन्दना, लगायतका कार्यक्रम भएको थियो । केन्द्रले २०६१ साल देखि सवालाख रोट महोत्सव गर्दै आएको छ ।
