कञ्चनपुर,पुस १४ गते। नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले देशमा सुशासन र भ्रष्टाचारविरुद्धको नयाँ युग सुरु गर्न माओवादी केन्द्रलाई बलियो बनाउन आवश्यक रहेको बताएका छन्।
कञ्चनपुर जिल्लाको पुनर्वासमा हिजो आयोजित भ्रष्टाचार र वेथितिका विरुद्ध खबरदारी तथा पार्टी एकता समायोजन सभामा सम्बोधन गर्दै प्रचण्डले माओवादी केन्द्र एक नम्बरको पार्टी भए मात्र देशमा सुशासनको युग सुरु हुने बताए।
भ्रष्टाचारविरुद्ध कडा कदम
सरकारले गरेका भ्रष्टाचारका काण्डहरूलाई खोतलेर कारबाही गर्ने प्रतिबद्धता व्यक्त गर्दै प्रचण्डले भने, “गिरिबन्धु, यति, नक्कली भुटानी शरणार्थी प्रकरण, वाइडबडी खरिद लगायतका भ्रष्टाचारमा संलग्नलाई कारबाहीको दायरामा ल्याइनेछ।” उनले भ्रष्टाचारको अन्त्यका लागि माओवादी केन्द्र बलियो हुनु अपरिहार्य भएको जोड दिए।
सुदूरपश्चिममा विकासको प्राथमिकता
सुदूरपश्चिम क्षेत्रको विकासलाई प्राथमिकतामा राख्दै प्रचण्डले सीमासम्बन्धी समस्याहरू समाधान गर्न भारतीय प्रधानमन्त्रीसँग स्पष्ट छलफल भएको बताए। उनले सुदूरपश्चिममा विश्वविद्यालय स्थापना, मध्य पहाडी र हुलाकी लोकमार्ग कार्यान्वयन, अन्तरदेशीय प्रसारण लाइन, कृषि आधारित उद्योग स्थापनालगायतका काम अघि बढाइएको जानकारी दिए।
नदी नियन्त्रण र भौतिक पूर्वाधारमा जोड
कैलाली र कञ्चनपुरका नदी नियन्त्रणका कामलाई तीव्रता दिने आश्वासन दिँदै प्रचण्डले सेती महाकाली क्षेत्रका समस्या समाधानका लागि माओवादी केन्द्र प्रतिबद्ध रहेको बताए।
चीनसँगको सहकार्यले विकासमा टेवा
हुम्लाको चीनसँगको नाका खुलेपछि सुदूरपश्चिमको आर्थिक विकासमा टेवा पुग्ने उल्लेख गर्दै उनले चीनले अनुदानमा बाटो बनाउने सहमति भइसकेको जानकारी दिए।
पार्टी एकता र देशव्यापी लोकप्रियतामा माओवादी केन्द्र अगाडि बढिरहेको उल्लेख गर्दै उनले पुनर्वासमा एमाले र कांग्रेसका हजारौं नेता कार्यकर्तालाई माओवादीमा स्वागत गरे। “अर्को चुनावमा माओवादी बलियो बनेपछि देशमा सुशासनको युग सुरु हुनेछ,” उनले विश्वास व्यक्त गरे।
पोखरा हव प्रा.लि. द्वारा प्रकाशित | पोखरा प्रेस डटकमसूचना विभाग दर्ता नं.: २३९६/०७७-०७८
Copyright © All right reserved to pokharapress.com Site By: SobizTrend.
