पोखरा, चैत २ गते। अखिल क्रान्तिकारी (पिएन क्याम्पस) ले पृथ्वीनारायण क्याम्पसमा व्याप्त अनियमितता, नातावाद, कृपावाद तथा मनोमानीको अन्त्य गर्न आफूहरूले स्वतन्त्र विद्यार्थी युनियन (स्ववियू) निर्वाचनमा उमेदवारी दिएको दाबी गरेको छ।
शुक्रबार क्याम्पस परिसरमा आयोजित उमेदवार परिचय कार्यक्रमलाई सम्बोधन गर्दै स्ववियू अध्यक्ष पदका प्रत्याशी नवीन अधिकारीले क्याम्पसको बेथितिविरुद्ध मतदान गर्न सम्पूर्ण विद्यार्थीलाई आग्रह गरे। “क्याम्पसमा ९,२६९ मतदाता रहे पनि करिब २,००० मात्र विभिन्न पार्टी निकट विद्यार्थी छन्, बाँकी स्वतन्त्र विद्यार्थी भएकाले सही निर्णय गरेर परिवर्तन सम्भव छ,” अधिकारीले भने।
अधिकारीका अनुसार अखिल क्रान्तिकारीले गण्डकी प्रदेश सरकार र स्थानीय तहहरूसँग सहकार्य गरी विभिन्न संकायका विद्यार्थीहरूलाई रोजगारी सिर्जना गर्ने महत्त्वाकांक्षी योजना अघि सारेको छ। साथै, पृथ्वीनारायण क्याम्पसमा कुनै आधिकारिक गठबन्धन नरहेको स्पष्ट पार्दै, स्ववियूलाई पारदर्शी र उत्तरदायी बनाउने प्रतिबद्धता व्यक्त गरे।
कार्यक्रममा अखिल क्रान्तिकारी गण्डकी प्रदेश उपाध्यक्ष वसन्त भट्टचनले भ्रष्टाचारविरुद्ध प्रधानमन्त्री प्रचण्डले थालेको अभियानलाई शैक्षिक संस्थामा पनि लागू गर्नुपर्ने धारणा राखे। “१६ वर्षदेखि रकम संकलन गर्दै आएको स्ववियूले अहिलेसम्म समेत पारदर्शिता अपनाएको छैन, अब यसलाई सुधार्नु जरुरी छ,” भट्टचनले गुनासो गरे।
अखिल क्रान्तिकारीकी नेतृ प्रविणा अधिकारीले २०६५ सालमा अखिल क्रान्तिकारीले शैक्षिक गुण्डागर्दीविरुद्ध उठाएको आवाज सम्झाउँदै क्याम्पसमा भइरहेको छात्रवृत्ति मनोपली, नातावाद र कृपावाद अन्त्य गर्न सबै विद्यार्थीहरू एकजुट हुनुपर्ने बताइन्।
पोखरा हव प्रा.लि. द्वारा प्रकाशित | पोखरा प्रेस डटकमसूचना विभाग दर्ता नं.: २३९६/०७७-०७८
Copyright © All right reserved to pokharapress.com Site By: SobizTrend.
