काठमाडौं,चैत्र ६ गते । जम्मा आठ दिन बिताउने सोचले अन्तरिक्ष गएका दुई अमेरिकी अन्तरिक्षयात्री नौ महिनापछि पृथ्वी फर्किएका छन्। नासाका अनुभवी अन्तरिक्षयात्री बुच विल्मोर र सुनीता विलियम्स प्राविधिक समस्याका कारण अन्तराष्ट्रिय अन्तरिक्ष केन्द्र (ISS) मा अड्किएपछि उनीहरूको यात्रा अपेक्षा गरेभन्दा निकै लामो बन्यो।

अन्तरिक्षकको ९ महिनापछिको अवतरण
स्पेसएक्स ड्र्यागन क्याप्सुलमार्फत उनीहरू अमेरिकाको फ्लोरिडा नजिकै समुद्री क्षेत्रमा १७ घण्टाको यात्रा गरेर अवतरण गरे। क्याप्सुलबाट बाहिरिने क्रममा उनीहरू हाँस्दै र हात हल्लाउँदै बाहिर निस्किएको दृश्य सामाजिक सञ्जालमा चर्चित बन्यो। नासाका अधिकारीहरूले दुबैको स्वास्थ्य राम्रो रहेको बताएका छन्।

अन्तरिक्षमा जीवन र कार्य
६९ वर्षीय सुनीता र ६२ वर्षीय बुचले ISS मा मर्मतकार्य, अनुसन्धान, र ऐतिहासिक ‘स्पेसवाक’ हरू गर्दै समय बिताए। जनवरीमा सुनीताले निक हेगसँग मिलेर यानको मर्मत गरिन् भने, त्यसै महिनाको अन्त्यतिर बुच र सुनीता दुवैले बाहिर निस्किएर प्रमुख उपकरणहरूको मर्मत सम्भार गरे।

उनीहरूले अन्तरिक्ष स्टेशनका प्रमुख प्रणालीहरू मर्मत गर्नेदेखि लिएर एनआईसीईआर एक्स-रे टेलिस्कोपमा नयाँ फिल्टरहरू स्थापना गर्ने काम गरे। यसबीच, उनीहरूलाई दिनमा १६ पटक सूर्योदय र सूर्यास्त हेर्ने अवसर मिल्यो, जसले अन्तरिक्षको सौन्दर्यलाई झनै अविस्मरणीय बनायो।

अन्तरिक्षबाटै मतदान
अमेरिकी नागरिक भएका बुच, सुनीता, डन पेटिट, र निक हेगले अन्तरिक्षमै रहेर अमेरिकी निर्वाचनमा भाग लिए। ह्युस्टनस्थित मिशन कन्ट्रोल सेन्टरले इन्क्रिप्टेड इमेलमार्फत् मतदान प्रक्रिया सहज बनायो। मतपत्रहरू अन्तरिक्ष स्टेशनमा पठाइए, जहाँ उनीहरूले आफ्नो मतदान गरे र त्यसलाई पृथ्वीमा सुरक्षित रूपमा पठाइयो।

अन्तरिक्षमा क्रिसमसको उत्सव
गत वर्षको क्रिसमस ISS मा रमाइलो तरिकाले मनाइयो। अन्तरिक्षयात्रीहरूले पृथ्वीमा रहेका आफन्त र साथीहरूलाई भिडियोमार्फत् शुभकामना दिए। उनीहरूका लागि सबैभन्दा रोमाञ्चक क्षण भने १६ मार्चमा आयो, जब स्पेसएक्स क्याप्सुल ISS मा नयाँ चालक दलका सदस्यहरू लिएर आइपुग्यो, जसले उनीहरूलाई घर फर्काउने सुनिश्चित गर्‍यो।

अन्ततः पृथ्वी फर्किए
नौ महिनासम्म अन्तरिक्षमा रहेर जीवनका अकल्पनीय अनुभव बटुलेका यी दुई अन्तरिक्षयात्री अन्ततः सफलतापूर्वक पृथ्वी फर्किए। अब उनीहरू आफ्नो जीवनको यस अविश्वसनीय यात्राबारे अनुभव साझा गर्दैछन्। आठ दिनको योजनाले नौ महिना लिएको यो मिशन निश्चय नै अन्तरिक्ष इतिहासको एउटा अविस्मरणीय अध्याय बन्न पुगेको छ। ऐजिन्सीको सहयोगमा