पोखरा, २७ जेठ । अखिल (क्रान्तिकारी) पोखरा महानगर समितिले अमरसिंह माध्यमिक विद्यालय, पोखरा १२ को व्यवस्थापन समितिबीच भएको ४८ घण्टे अल्टिमेटमपछि वार्ता र छलफलबाट आफ्ना मागहरू पूरा भएको घोषणा गरेको छ। अखिल (क्रान्तिकारी) का पोखरा महानगर समिति इन्चार्ज मनिष तामाङले एक विज्ञप्तिमार्फत उक्त जानकारी गराएका हुन्।
क्रान्तिकारीले विद्यार्थीमाथि भएको कुटपिट लगायतका विषयमा ४८ घण्टाभित्र माग पूरा नभए आन्दोलन गर्ने चेतावनी दिएको थियो। सोही अल्टिमेटमपछि भएको वार्तामा विद्यालय व्यवस्थापन समिति आफ्ना मागहरू पूरा गर्न सहमत भएको हो।
पूरा भएका प्रमुख मागहरू:
विद्यार्थी कुटपिट गर्ने शिक्षक बर्खास्त: विद्यार्थीमाथि कुटपिट गर्ने शिक्षक दीपक दाहाललाई बर्खास्त गर्ने निर्णय भएको छ
घाइते विद्यार्थीको उपचार खर्च: कुटपिटबाट घाइते भएका विद्यार्थीको सम्पूर्ण उपचार खर्च शिक्षक दीपक दाहालले नै बेहोर्ने भएका छन्।
गैरकानुनी नियुक्ति खारेज, प्रक्रिया पुर्याएर नियुक्ति: गैरकानुनी रूपमा विज्ञापनविना नियुक्ति भएका शिक्षक तथा कर्मचारीको पद खारेज गरी पूर्ण विज्ञापन खुलाई प्रक्रिया अनुसार नियुक्ति गरिने भएको छ। यसमा हाल कार्यरत शिक्षक तथा कर्मचारीलाई प्राथमिकता दिइनेछ।
शाखा प्रमुखको कार्यसम्पादन मूल्यांकन: शाखा प्रमुखको विषयमा प्रश्न उठेको हुनाले उनको कार्यसम्पादन मूल्यांकन राम्रो नदेखिएमा परिवर्तन गर्ने निर्णय भएको छ।
अखिल (क्रान्तिकारी) ले विद्यार्थी हित र शैक्षिक सुशासनका लागि गरिएका प्रयास सफल भएको बताएको छ।
पोखरा हव प्रा.लि. द्वारा प्रकाशित | पोखरा प्रेस डटकमसूचना विभाग दर्ता नं.: २३९६/०७७-०७८
Copyright © All right reserved to pokharapress.com Site By: SobizTrend.
