काठमाडौं, २ साउन। नेपाल र चीनबीच दौत्य सम्बन्ध स्थापनाको ७०औं वार्षिकोत्सव नजिकिँदै गर्दा दुई देशका कलाकारबीचको सम्बन्ध अझ प्रगाढ बनाउने उद्देश्यले नेपाल चीन प्रतिष्ठान र नेपाल व्यवसायी कलाकार संघबीच सहकार्य भएको छ।
संघको कार्यालय बागबजारमा बिहीबार आयोजित एक विशेष कार्यक्रममा दुवै संस्थाबीच सम्झौता भएको हो। सम्झौतापत्रमा नेपाल चीन प्रतिष्ठानका अध्यक्ष मेल्सम ओझा र नेपाल व्यवसायी कलाकार संघका अध्यक्ष प्रेमलाल श्रेष्ठले हस्ताक्षर गरे।
कार्यक्रममा बोल्दै अध्यक्ष ओझाले नेपाली कलाकारको प्रतिभा चीनमा परिचय गराउने कार्यमा प्रतिष्ठानले अग्रसर भूमिका खेल्ने बताए। “कला र संस्कृतिको विकासका लागि आवश्यक अनुसन्धान, योजना र कार्यान्वयन दुबै संस्थाले संयुक्त रुपमा अघि बढाउनेछौं,” ओझाले भने, “चिनियाँ कलाकारलाई पनि नेपालसँग परिचित गराउने अभियानलाई समेत तीव्र बनाउनेछौं।”
उक्त सहकार्यमार्फत नेपाली र चिनियाँ कलाकारबीच आपसी सहकार्यलाई विस्तार गर्दै सदियौं पुरानो नेपाल–चीन जनसम्बन्धलाई सांस्कृतिक माध्यमबाट नयाँ उचाइमा पुर्याउने प्रण गरिएको आयोजकहरूले जनाएका छन्।
संघका अध्यक्ष श्रेष्ठले सहकार्यले दुई देशका कलाकारबीचको समझदारी र आत्मीयता अझ प्रगाढ हुने विश्वास व्यक्त गरे। उनले यस किसिमको सांस्कृतिक सहकार्यले केवल कला र संस्कृतिको विकास मात्रै होइन, दुई देशबीचको मैत्री सम्बन्धलाई समेत बलियो बनाउने बताए।
नेपाल चीन प्रतिष्ठान सन् २००६ मा र नेपाल व्यवसायी कलाकार संघ सन् १९९५ मा स्थापना भएका हुन्। दुबै संस्थाले विगतदेखि नै कला र संस्कृति प्रवर्द्धनमा सक्रिय भूमिका निर्वाह गर्दै आएका छन्।
पोखरा हव प्रा.लि. द्वारा प्रकाशित | पोखरा प्रेस डटकमसूचना विभाग दर्ता नं.: २३९६/०७७-०७८
Copyright © All right reserved to pokharapress.com Site By: SobizTrend.
