काठमाडौं,६ साउन। सुकुम्बासी बस्ती जोगाउन भन्दै नेकपा माओवादी केन्द्रको सहायक संगठन योङ कम्युनिष्ट लीग नेपाल वाईसीएलले मनोहरा खोलामा तटबन्ध निर्माण गरेको छ।
वर्षायाममा बाढी आउँदा बस्ती डुबानमा पर्ने र ठूलो जनधनको क्षति हुने विगत सम्झँदै त्रसित रहेका बस्तीबासीको अनुरोधमा वाईसीएलले अस्थायी तटबन्ध निर्माण गरेको हो। श्रम तथा उत्पादनमा वाईसीएल अभियान अन्तर्गत बागमती र सम्पर्क विषेश प्रदेशको आयोजना तथा काठमाडौँ र भक्तपुर जिल्ला समितिसँगको सहकार्यमा भएको उक्त श्रमदानमा हजारौंको सहभागिता रहेको थियो।
सरकारी तवरबाट हुने विकासबाट पछाडी पारिएको उक्त क्षेत्रमा भएको श्रमदानमार्फत दुईसय मिटर लामो र पाँच फिट अग्लो तटबन्ध बनाई बस्ती सुरक्षित गरिएको अध्यक्ष पुष्प ओलीले बताए।
उक्त अभियानमा माओवादी केन्द्रका उपमहासचिव शक्ति बस्नेत, केन्द्रीय सदस्य एवं वाईसीएल ईन्चार्ज रामप्रसाद सापकोटा दीपशिखा, केन्द्रीय सदस्य तथा प्रतिनिधिसभा सदस्य राजन दाहाल, केन्द्रीय सदस्यहरू दिलिप प्रजापती, डिपी ढकाल तथा वाईसीएलका पदाधिकारीहरू, भक्तपुरका स्थानीय जनसमुदायको उपस्थिति थियो।
पोखरा हव प्रा.लि. द्वारा प्रकाशित | पोखरा प्रेस डटकमसूचना विभाग दर्ता नं.: २३९६/०७७-०७८
Copyright © All right reserved to pokharapress.com Site By: SobizTrend.
