रेशम केसी/काठमाडौं, साउन ६ । नेपाल क्रिकेट संघ (क्यान) र कुवेत क्रिकेट बोर्डबीच पुरुष तथा महिला क्रिकेट टोलीबीच वार्षिक द्विपक्षीय सिरिज आयोजना गर्ने सहमति भएको छ। यो ऐतिहासिक समझदारी सन् २०२६ देखि लागू हुनेछ।
सम्झौता अनुसार प्रत्येक वर्ष घरेलु तथा विदेशी मैदानमा कम्तीमा ३ वटा टी–२० अन्तर्राष्ट्रिय खेल र थप एकदिवसीय खेल (५० ओभर) आयोजना गरिनेछ।
यो रणनीतिक साझेदारीले एसोसिएट राष्ट्रहरूबीच अन्तर्राष्ट्रिय अनुभव र प्रतिस्पर्धात्मक क्रिकेटको अवसरलाई सुदृढ बनाउने अपेक्षा गरिएको छ।
नेपालले हालै सम्पन्न ICC T20 विश्वकप २०२४ मा आफ्नो प्रतिभा देखाइसकेको छ भने कुवेत आगामी ICC पुरुष T20 विश्वकप २०२६ को एसिया क्षेत्रीय छनोटको तयारीमा जुटिरहेको छ। यस्तो अवस्थामा भएको यो सहकार्यले उदीयमान खेलाडीहरूलाई अन्तर्राष्ट्रिय प्रतिस्पर्धाको थलो प्रदान गर्नुका साथै कुवेतमा रहेका नेपाली समुदायसँगको सांस्कृतिक तथा खेलकुद सम्बन्धलाई थप मजबुत बनाउने विश्वास गरिएको छ।
थप रोचक पक्ष यो पनि छ कि दुवै टिम २०२६ को एसिया क्षेत्रीय छनोटमा एउटै समूहमा पनि परेका छन्। यसले आगामी दिनमा दुवै टिमबीचको प्रतिस्पर्धालाई झन् रोमाञ्चक बनाउनेछ।
वार्षिक सिरिज एसोसिएट क्रिकेट क्यालेन्डरमा एउटा महत्वपूर्ण माइलस्टोन बन्ने अपेक्षा गरिएको छ, जसले आपसी विकास, खेल कौशल, र दीर्घकालीन सहकार्यलाई टेवा पुर्याउनेछ।
पोखरा हव प्रा.लि. द्वारा प्रकाशित | पोखरा प्रेस डटकमसूचना विभाग दर्ता नं.: २३९६/०७७-०७८
Copyright © All right reserved to pokharapress.com Site By: SobizTrend.
