माछापुच्छ्रे (कास्की), ६ भाद्र। लामो समयदेखि निर्माण कार्य रोकिएको माछापुच्छ्रे गाउँपालिकास्थित एन्फा टेक्निकल इन्स्टिच्युटले पुनः गति लिने आशा जागेको छ। पूर्वप्रधानमन्त्री तथा नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ ले आज प्रस्तावित इन्स्टिच्युटको स्थलगत अवलोकन गरेपछि स्थानीयमा यो आशा पलाएको हो।
माछापुच्छ्रे गाउँपालिकाको नेतृत्वले निष्क्रिय आयोजनालाई ब्युँताउन निरन्तर पहल गर्दै आएको थियो। सोही क्रममा केही दिनअघि गाउँपालिका अध्यक्ष मिन बहादुर गुरुङको नेतृत्वमा गएको एक प्रतिनिधिमण्डलले अध्यक्ष प्रचण्डलाई ज्ञापनपत्र बुझाएको थियो। उक्त ज्ञापनपत्रप्रति सकारात्मक प्रतिक्रिया जनाउँदै प्रचण्ड आज गाउँपालिकाको वडा नं. ६, धितालस्थित परियोजना स्थलको अवलोकनका लागि पुगेका हुन्।
स्थलगत अवलोकन नेकपा (माओवादी केन्द्र) गण्डकी प्रदेश ३ क संयोजक भोजराज पौडेलको बिशेष पहल एबम गाउँपालिका अध्यक्ष गुरुङ, माओवादी केन्द्र माछापुच्छ्रे गाउँपालिका समिति अध्यक्ष गोपाल पोखरेल र स्थानीय अगुवाहरूको उपस्थिति थियो।
स्थलगत अवलोकनपछि उपस्थित स्थानीय तथा नेता–कार्यकर्तालाई सम्बोधन गर्दै अध्यक्ष प्रचण्डले ठूला आयोजनाहरूको सफलताका लागि साझा प्रयास आवश्यक रहेको बताए। उनले भने, “राजनीतिक फरक धार पन्छाएर साझा प्रयासमार्फत अघि बढ्दा मात्र यस्ता आयोजना सफल हुन्छन्।” उनले यो आयोजनालाई राष्ट्रिय गौरवको विषय बनाउन सबै दल एक ठाउँमा उभिनुपर्नेमा जोड दिए।
अध्यक्ष प्रचण्डले स्थलगत अध्ययनपछि अब अखिल नेपाल फुटबल सङ्घ (एन्फा) का पदाधिकारीहरूसँग छलफल गरी निर्माण कार्य अघि बढाउन सहज वातावरण बनेको बताए। उनले आवश्यक पहल र सहकार्यका लागि आफूले केन्द्रीय स्तरबाटै भूमिका खेल्ने प्रतिबद्धतासमेत व्यक्त गरे।
स्थानीयमा उत्साह
नेकपा (माओवादी केन्द्र) गण्डकी प्रदेश ३ क संयोजक भोजराज पौडेलले यस क्षेत्रमा फुटबल र खेलकुदको विकासमा महत्त्वपूर्ण योगदान पुग्नु साथै स्थानीय प्रतिभालाई अवसर प्रदान गरी समग्र खेलकुद क्षेत्रको विकासमा मद्दत गर्ने धारणा ब्यक्त गरे।
प्रचण्डको भ्रमण र प्रतिबद्धताले स्थानीयवासीमा उत्साह छाएको छ। अब इन्स्टिच्युट बन्नेमा आफूहरू पूर्ण आशावादी रहेको स्थानीयले प्रतिक्रिया दिएका छन्। गाउँपालिकाले यस पहललाई शिक्षा, खेलकुद र समग्र विकासका लागि एक ऐतिहासिक कदमका रूपमा लिएको छ। यो इन्स्टिच्युट सञ्चालनमा आएमा यस क्षेत्रमा फुटबल प्रतिभाको विकास हुनुका साथै समग्र खेलकुद क्षेत्रले फड्को मार्ने र स्थानीय स्तरमा रोजगारीका अवसरहरू सिर्जना हुने अपेक्षा गरिएको छ।
#प्रचण्ड #खेलकुद
