काठमाडौं, ८भाद्र।नेपाल पर्वतारोहण संघ (एनएमए) को निर्वाचनमा सत्ता गठबन्धन कांग्रेस–एमालेलाई कडा धक्का दिँदै माओवादी समर्थन प्राप्त समूहले ऐतिहासिक जीत हात पारेको छ। माओवादी निकट मानिएका फुर ग्याल्जे शेर्पाले ३४२ मतसहित अध्यक्षमा विजयी भई एनएमएको नेतृत्व सम्हाल्ने भएका छन्। उनका प्रतिद्वन्द्वी कुल बहादुर गुरुङले २८८ मत पाए।
यस पटकको निर्वाचनमा फुर ग्याल्जे समूहले बहुमत पदमा कब्जा जमाएको छ। वरिष्ठ उपाध्यक्षमा इश्वरी पौडेलले ३४५ मतसहित जिते भने प्रथम उपाध्यक्षमा मिङ्मा ग्याबो शेर्पाले ३५९ मत ल्याएर काजी शेर्पालाई पछि पारे। द्वितीय उपाध्यक्षमा बोध राज भण्डारी ३६८ मतका साथ विजयी भए।
महासचिवमा राजेन्द्र बहादुर लामाले ३१८ मत पाउँदै प्रतिद्वन्द्वी विमल नहर्की (२०९) र शिव सापकोटा (६८) लाई हराए। सचिवमा चन्दन थापा ३५८ मतसहित विजयी भए भने कोषाध्यक्षमा ङिमा नुर्बु शेर्पा र सुमी लामाबीच बराबरी (३०४–३०४) भएपछि सहमतिअनुसार गोलाप्रथाबाट आधा–आधा कार्यकाल सम्हाल्ने निर्णय भएको छ।
सदस्यतर्फ पनि फुर ग्याल्जे समूहको दबदबा देखियो। माधवकुमार धमला (२७८), केदार न्यौपाने (३०२), थुप्देन शेर्पा (३२६), गोकुल थापा (२८८), मुलाल गुरुङ (३५१), देण्डी शेर्पा (३११), विक्रम कार्की (३०६), रिञ्जे शेर्पा (३०१), देवेन्द्र डंगोल (२९५), दिकी शेर्पा (२८८) र निशा भोटे (३०७) विजयी भए।
निर्वाचन परिणामले स्पष्ट देखाएको छ कि कांग्रेस–एमाले गठबन्धनका उम्मेदवारहरूलाई मतदाताले यसपटक सीमित समर्थन मात्र जनाए। माओवादी समर्थन प्राप्त समूहले लगभग सबै पदमा जित हात पारेको हुँदा आगामी कार्यकालमा संघको नीतिगत निर्णयमा नयाँ सोच र दिशा आउने अपेक्षा गरिएको छ।
नवनिर्वाचित अध्यक्ष फुर ग्याल्जे शेर्पाले परिणामपछि प्रतिक्रिया दिँदै भने, “यो विजय व्यक्तिगत मात्र होइन, सबै पर्वतारोहण प्रेमीहरूको हो। संघलाई पारदर्शी, सदस्यमैत्री र अन्तर्राष्ट्रिय स्तरमा प्रतिस्पर्धी बनाउन हामी प्रतिवद्ध छौं।”
#NMAElection2025 #पोखराप्रेस
