गोरखा। गोरखामा आसन्न प्रतिनिधिसभा र प्रदेशसभा निर्वाचनका लागि प्रत्यक्षतर्फको मतपत्र आइपुगेको छ । निर्वाचन आयोगले जिल्लाका २ प्रतिनिधिसभा र ४ प्रदेशसभा निर्वाचन क्षेत्रका लागि पठाएको प्रत्यक्षतर्फको मतपत्र आइपुगेको हो ।निर्वाचन क्षेत्र नम्वर १ मा प्रतिनिधिसभाका लागि १ लाख २७ हजार र क्षेत्र नम्वर २ मा १ लाख १६ हजार थान मतपत्र आइपुगेको जिल्ला निर्वाचन कार्यालयका सूचना अधिकारी रविलाल सुवेदीले जानकारी दिए ।
यस्तै निर्वाचन क्षेत्र नम्वर १ को प्रदेश (क) का लागि ६७ हजार र (ख) का लागि ६१ हजार थान मतपत्र आइपुगेको छ । क्षेत्र नम्वर २ को प्रदेश (क) का लागि ५६ हजार र प्रदेश (ख) का लागि ६१ हजार थान मतपत्र आएको सुवेदीले बताए। आयोगले कुल मतदाता संख्या भन्दा १० प्रतिशत थप मतपत्र पठाएको हो । समानुपातिकतर्फको मतपत्र भने गत कात्तिक ६ गते जिल्लामा आइसकेको छ । मतपत्र सम्बन्धित क्षेत्रको निर्वाचन अधिकृतको कार्यालयमा भण्डारण गरिएको छ ।
अब मतदान अधिकृत र सहायक मतदान अधिकृतलाई अभिमुखीकरण गरि मतपत्र र अन्य निर्वाचन सामग्री सहित तोकिएको मतदान केन्द्रमा पठाइनेछ । मतदान अधिकृत र सहायक मतदान अधिकृतका लागि कात्तिक २३ देखि २६ गतेभित्र अभिमुखीकरण गरिसक्ने निर्वाचन आयोगको कार्यतालिका रहेको छ ।
पोखरा हव प्रा.लि. द्वारा प्रकाशित | पोखरा प्रेस डटकमसूचना विभाग दर्ता नं.: २३९६/०७७-०७८
Copyright © All right reserved to pokharapress.com Site By: SobizTrend.
