गाेरखा। गोरखामा ट्राफिक प्रहरीले ज्यादती मच्चाएकाे भन्दै यातयात व्यवसायीहरुले विभिन्न १० बुदे मागसहित उपप्रधान तथा भौतिक पूर्वाधार तथा यातयात मन्त्री नारायणकाजी श्रेष्ठलाई बुुधबार ज्ञापन पत्र बुझाइएका छन् ।
जिल्लाका यातायात व्यवसायीले प्रदुषण जाँच तथा जरिवानाको त्रास रहेको र ट्राफिक प्रहरीले आतंक मच्चाएको भन्दै गोरखा प्रजिअ दिनेशसागर भुषाल मार्फत उपप्रधानमन्त्री तथा भौतिक पूर्वाधार यातायात मन्त्री नारायणकाजी श्रेष्ठलाई ज्ञापन पत्र पठाएका छन् ।
यातायात व्यवसायीहरुले बुझाएको ज्ञापन–पत्रमा प्रदुषण जाँच तथा जरिवानाको त्रास र ट्राफिक प्रहरीको आतंक बन्द हुनु पर्ने माग गरिएको छ । यस्तै ऐन कानुनको कार्यान्वयन, पिक एण्ड ड्रपको व्यवस्था, पूर्वाधार विकास तथा पार्किङ सुविधा, ऐन र नियावलीको संशोधन, यातायात क्षेत्रको सुधार र पुनर्जागरण गर्न राष्ट्रिय यातायात प्राधिकरण गठनको माग गरिएको छ । चीन भारत नाकाको समस्या, सिमापारीको सुरक्षा र सुरक्षित भविष्यको सुनिश्चताको लागि योगदानमा आधारित सामाजिक सुरक्षा, सडक सुशासनको लागि रोड सेफ्टी काउन्सिल निर्माण तथा यातायात र व्यवसायीका दिर्घकालीन समस्या समधान गर्न आयोग गठन लगायतका माग गरिएको छ ।
नेपाल यातायात स्वतन्त्र मजदुर संगठन गण्डकी प्रदेशका अध्यक्ष विष्णुबहादुर खत्री क्षेत्री, नेपाल यातायात मजदुर संघ गण्डकी प्रदेशका अध्यक्ष किरणबाबु पन्त र अखिल नेपाल यातायात मजदुर संघ गण्डकी प्रदेशका अध्यक्ष सुर्यभक्त पौडेलेको हस्ताक्षर गरिएको पत्र प्रजिअ भुषाललाई बुझाएको हो ।
सो कार्यक्रममा अखिल नेपाल मजदुर संघका अध्यक्ष निर्मल राना, नेपाल यातायात मजदुर संघ गोरखा अध्यक्ष शंकर श्रेष्ठ लगायत यातायात व्यवसायीहरुको उपस्थिति रहेको मजदुर नेता कपिल नेपालीले जानकारी दिए ।
