पोखरा । नेपालको समग्र राजनीतिमा नै विभिन्न किसिमका विकृति र विचलन देखिंदै आएका छन्, तर ताजा घटनाले मधेश प्रदेशमा नै लोकतान्त्रिक मर्यादाको सड्कट संकेत दिएको छ। संविधानको आत्मा र प्रक्रियालाई पन्छाउँदै एमालेले रातारात सत्ता कब्जा गर्ने दुस्साहस देखाएको छ।
मधेश प्रदेशकी प्रदेश प्रमुख सुमित्रा सुवेदी भण्डारीले “उपचारका लागि काठमाडौं जाँदैछु” भन्दै जनकपुरबाट निस्किएर बर्दिवास पुगेर होटल पानस कटेजमा बिहानै ५ बजेर २० मिनेटमा एमालेका नेता सरोज कुमार यादवलाई मुख्यमन्त्रीको शपथ गराएकी छन्। यस्तो घटनाले लोकतान्त्रिक प्रक्रियामाथि एमालेले खुलेआम ठट्टा गरेको स्पष्ट देखिन्छ।
संविधानको धारा १६८ को उपधारा ३ अनुसार ठूलो दलको हैसियतमा एमालेका यादवलाई मुख्यमन्त्री नियुक्त गरिएको बताइए पनि, संविधानले दिएको अवसर र जिम्मेवारीको अपमान गर्दै प्रदेश प्रमुख स्वयं नै रातारात होटलमा गएर सपथ गराउनु नै विचित्रको घटनाक्रम बनेको छ।
प्रदेश प्रमुख भण्डारीलाई कांग्रेस, माओवादी केन्द्र, नेकपा (एकीकृत समाजवादी), लोसपा, जनमत र जसपाका सांसदहरूले संविधानको धारा १६८(२) अनुसार गठबन्धन सरकार गठन गर्न आह्वान गर्न दबाब दिइरहेका थिए। तर, एमालेको दबाबमा प्रदेश प्रमुखले लोकतान्त्रिक अभ्यासभन्दा पार्टी निष्ठा रोजेकी देखिन्छिन्।
यस्तो संवैधानिक अपहेलनाको शैली एमालेको पुरानै चरित्रलाई उजागर गर्छ — जब जब जनमतले अस्वीकार गर्छ, तब तब एमालेले रातारात सत्ता कब्जा गर्ने प्रवृत्ति देखाउँछ। बर्दिवासको होटललाई प्रदेश प्रमुखको कार्यालय बनाइएको घटना त्यो चरित्रको नाङ्गो उदाहरण हो।
एमाले सांसद लखन दास तत्मा, नेपाल संघीय समाजवादी पार्टीकी बिमला अंसारी र राप्रपाकी कंचन बिच्छाले पनि त्यही होटलमै विना विभागीय मन्त्रीको शपथ लिएका छन्, जसले लोकतन्त्रको मर्यादालाई थप लज्जास्पद बनाएको छ।
यसअघि भण्डारीले विपक्षी दलहरूसँग छलफल गरेर निर्णय लिने प्रतिबद्धता जनाएकी थिइन्, तर त्यसको केही घण्टामै एमालेको निर्देशनअनुसार कदम चाल्नु, मधेश प्रदेशमा संवैधानिक अपहरणको जस्तो दृश्य देखिएको छ।
