काठमाडौंः नेपाली कांग्रेसका सहमहामन्त्री प्रकाशशरण महतले प्रधानमन्त्री केपी शर्मा ओलीले दुई वर्षसम्म गफ चुट्ने काम मात्रै गरेको आरोप लगाएका छन्।
काठमाडौं क्षेत्र नम्बर ५ मा आज आयोजित प्रदर्शनपछि सभालाई सम्बोधन गर्दै महतले ओलीलाई सो आरोप लगाएका हुन् । उनले भने, ‘ओली सरकारले आकाश पाताल जोड्ने गफ चुटे पनि काम गरेनन् ।’ प्रधानमन्त्री ओलीले रेल र पानीजहाज ल्याउने कुरा गरे पनि दुई वर्षसम्म सर्भेसमेत नभएको बताए ।
‘खोइ रेल र पानीजहाज ? कुरैकुरामा जनतालाई रनभुल्लमा पार्ने ? गफैले जनता अगाउँछन् भनेर गफ लगाइदिने ?’ उनले प्रश्न गरे ।
उनले ओली सरकारले संस्थागत भ्रष्टाचार गरिरहेको पनि बताए । सरकारले भ्रष्टाचार र कमिसनभन्दा अर्को शब्द नजानेको भन्दै कांग्रेस सहमहामन्त्री डा. महतले भने, ‘कोभिडको यत्रो महामारीमा भ्रष्टाचार गर्नु त के, सोच्नु पनि पाप हो । तर उहाँहरुले त भ्रष्टाचार सोचेको मात्र होइन, गरेरै देखाउनु भयो ।’
