पोखरा। पोखरामा जारी नवौँ राष्ट्रिय खेलकुद प्रतियोगिताको समापन समारोहका अवसरमा पोखरा महानगरले आज दिउसो १:०० बजेपछि विशेष बिदा दिने भएको छ । महानगरले हिजो सूचना जारी गरी राष्ट्रिय खेलकुद प्रतियोगिताको समापन समारोहका लागि महानगरपालिकाका महाशाखा तथा शाखाहरू, वडा कार्यालयहरू, सामुदायिक तथा संस्थागत विद्यालय एवं मन्टेश्वरीहरुमा दिउँसो एक बजेपछि विशेष बिदा दिइएको जनाएको छ ।
महानगरले समापन समारोहमा महानगरपालिका अन्तर्गतका सम्पूर्ण कार्यालयहरूमा कार्यरत कर्मचारीहरू, शिक्षक, विद्यार्थी, सामाजिक सङ्घसंस्थाहरूलाई सहभागी हुन समेत बिशेष आग्रह गरेको छ ।नागरिक समाज, आमा समुह, टोल विकास संस्था, युवा क्लब, बैँक तथा वित्तीय संस्थामा कार्यरत कर्मचारीहरू लगायत आम नगरवासीहरूलाई दिउँसो २ बजे नयाँबजार स्थित प्रदर्शनी केन्द्रमा उपस्थित हुन पनि अनुरोध गरिएको छ ।
प्रदर्शनी केन्द्रबाट जम्मा भएर बृहत् सहभागिताबीच पोखरा रङ्गशालामा प्रवेशको कार्यक्रम रहेको महानगरले जनाएको छ ।
राष्ट्रिय खेलकुदको मुख्य आयोजना स्थलका रूपमा पोखरा महानगरपालिका र यसका विभिन्न वडाहरूमा रहेका खेलमैदानहरूमा प्रमुख खेलहरू सञ्चालन भएका थिए। त्यसो त राष्ट्रिय खेलकुदआयोजना पोखरामा हुनु आम पोखराबासीहरुको लागि गौरबको बिषय रहेको पोखरा महानगरपालिकाका मेयर धनराज आचार्यले बताए।उनले समापन समाहरोमा सम्पूर्ण पोखराबासी जनसमुदायलाई उपस्थितिको लागि अनुरोध समेत गरे।
