भरतपुर,६ कार्तिक। चितवन कारागारमा कैदीबन्दीको संख्या क्षमताभन्दा बढी भएपछि १६ जना कैदीबन्दीलाई अन्य जिल्ला स्थानान्तरण गरिएको छ ।
कारागारका सूचना अधिकारी चेतनाथ ढुङ्गानाका अनुसार स्थानान्तरण हुनेमध्ये आठ जनालाई रसुवा, सात जनालाई काठमाडौँ र एक जनालाई तनहुँ पठाइएको छ । स्वास्थ्य समस्या भएका ६ जना कैदीबन्दीलाई थप उपचारका लागि काठमाडौँ पठाइएको छ भने अन्यलाई उनीहरूको इच्छाअनुसार अन्यत्र स्थानान्तरण गरिएको हो ।
चितवनमा सङ्घीय भरतपुर अस्पताल, बिपी कोइराला मेमोरियल क्यान्सर अस्पताल, दुई ठूला मेडिकल कलेजलगायतका स्वास्थ्य संस्थाहरू भएकाले जिल्ला बाहिरका कैदीबन्दीलाई उपचारका लागि चितवन ल्याइने हुँदा कारागारमा चाप बढेको हो । यसका साथै, नवलपरासी (बर्दघाट–सुस्ता पूर्व) मा कारागार नहुँदा त्यहाँबाट पनि कैदीबन्दी चितवन ल्याइने गरिएको छ ।
दुई सय ८० जनाको क्षमता रहेको चितवन कारागारमा अहिले सात सय ८४ कैदीबन्दी छन् । महिला बन्दीगृहमा क्षमताभन्दा बढी र पुरुष बन्दीगृहमा पनि क्षमताभन्दा दोब्बरभन्दा बढी कैदीबन्दी छन् ।
