पोर्चुगल,२३ साउन। मेहनत, समर्पण र राष्ट्रिय गौरवको भावनाले भरिएको यात्रामा, पोर्चुगलका नेपाली युवा भलिबल खेलाडीहरूले फ्रान्समा सम्पन्न युरोपस्तरीय प्रतियोगितामा ऐतिहासिक सफलता हासिल गरेका छन्।
युरोपभरि कार्यरत नेपाली समुदायको सहयोग, उत्साह र ऐक्यबद्धताले निर्माण गरेको यो यात्राले खेल र प्रवासबीचको सम्बन्धलाई थप गहिरो बनाएको छ।
प्रतियोगिताको पूर्वसन्ध्यामा, नेपाल जनप्रगतिशील मञ्च पोर्चुगल र एनआरएनए पोर्चुगलले संयुक्त रूपमा खेलाडीहरूलाई दुई थान भलिबल हस्तान्तरण गरेका थिए। २८ जुलाई २०२५ मा सम्पन्न उक्त कार्यक्रममा मञ्चका युरोप सचिव हरिस पोखरेल, सदस्य युवराज खनाल, एनआरएनए पोर्चुगलका उपाध्यक्ष नृपेश गिरी, महासचिव गोविन्द बुढाथोकी र सचिव सुवास पौडेल सहभागी थिए। सो अवसरमा प्रतियोगिताका लागि शुभकामना व्यक्त गर्नुका साथै खेलाडीहरूसँग बृहत् अन्तरक्रिया पनि गरिएको थियो।
प्रतियोगितामा विजय प्राप्त गरी स्वदेश फर्किएका खेलाडीहरूको सम्मानमा ४ अगस्ट २०२५ मा एक भव्य कार्यक्रम आयोजना गरियो। कार्यक्रममा एनआरएनए पोर्चुगलका नव निर्वाचित अध्यक्ष दीपा काफ्ले, उपाध्यक्षद्वय नृपेश गिरी र विष्णु बहादुर घर्ती, महिला उपाध्यक्ष पेमा डोमा शेर्पा, महासचिव गोविन्द बुढाथोकी, सचिव सुभाष पौडेल, युवा संयोजक पेम्बा शेर्पा, लेखासंयोजक सुरेश गिरी तथा नेपाल जनप्रगतिशील मञ्चका नेता सूर्य सौगात सहभागी थिए।
अध्यक्ष काफ्लेले नेपाली खेलाडीहरूको अन्तर्राष्ट्रिय सफलता प्रति कृतज्ञता व्यक्त गर्दै भनिन्, “नेपालीहरूको सम्मान विश्वमञ्चमा उच्च बनाउनु गर्वको कुरा हो। निकट भविष्यमा पोर्चुगलमै भलिबल कप आयोजना गर्ने प्रतिबद्धता हाम्रो हुनेछ।”
खेल टिमका व्यवस्थापक तथा टिम लिडर नरेश भट्टले आफूहरू पहिलोपटक यस्तो उच्च सम्मान पाउँदा गौरव महसुस भएको उल्लेख गर्दै भने, “खेल र खेलाडीको मूल्य बुझ्नु भनेको सम्पूर्ण युवाशक्तिको पहिचान गर्नु हो। वर्तमान नेतृत्वले त्यो सन्देश व्यवहारमा उतारेको छ।”
उक्त टोलीमा अधिकांश खेलाडीहरू नेपालमा राष्ट्रिय टिममा प्रतिनिधित्व गरिसकेका अनुभवी अनुहारहरू हुन्, जो हाल पोर्चुगलमा विभिन्न पेशागत क्षेत्रमा क्रियाशील छन्। प्रवासमा रहेर पनि आफ्ना पहिचान र प्रतिभालाई अन्तर्राष्ट्रिय मञ्चमा चिनाउने उनीहरूको यो सफल प्रयास सम्पूर्ण नेपाली डायस्पोराका लागि प्रेरणाको स्रोत बनेको छ।
नेपाल जनप्रगतिशील मञ्च युरोप र एनआरएनए पोर्चुगलको सहकार्य, खेलाडीहरूको समर्पण र समुदायको साझा समर्थनले यो सफलता सम्भव भएको हो।
यो यात्रा केवल खेलको विजय मात्र होइन —
यो सम्पूर्ण प्रवासी नेपाली समुदायको सामूहिक गर्व र गौरवको गाथा हो।
