पोखरा। राष्ट्रिय स्वतन्त्र पार्टी (रास्वपा) भित्रको आन्तरिक विवाद अब खुला संघर्षमा बदलिएको छ । बारा जिल्लामा पालिका तहदेखि चुलिएको शक्ति संघर्षले जिल्ला कमिटी नै विघटन भएपछि पार्टीले सबै संगठनात्मक कार्यक्रम स्थगित गर्नुपरेको छ ।
वैशाख २७ गते जिल्ला कमिटी विघटन गरेपछि रास्वपाभित्रको संकट झन् गहिरिएको देखिएको छ ।
वडा, पालिका र क्षेत्रीय तहमा बढेको अविश्वास, गुटबन्दी र नेतृत्व विवादका कारण पार्टी गतिविधि नै रोक्नुपर्ने अवस्था आएको हो ।
रास्वपा बारा संगठन निर्माण समितिले अर्को सूचना जारी नभएसम्म सम्पूर्ण कार्यक्रम स्थगित गरिएको जनाएको छ । आन्तरिक विवाद समाधानका लागि विस्तारित बैठक बोलाइए पनि विवाद मिल्नेभन्दा झन् चर्किने संकेत देखिएको स्रोतहरूको दाबी छ ।
“पुराना दलभन्दा फरक” दाबी गर्दै आएको रास्वपा अहिले आफ्नै संगठन जोगाउन संघर्षरत देखिएको छ । स्थानीय तहको विवाद केन्द्रसम्म पुगेपछि पार्टी नेतृत्वमाथि व्यवस्थापन क्षमताको गम्भीर प्रश्न उठ्न थालेको छ ।
