पोखरा, जेठ ८ । अमेरिकी गुप्तचर निकायहरूले इरानको सैन्य क्षमता अपेक्षाभन्दा धेरै छिटो पुनः सुदृढ बन्दै गएको निष्कर्ष निकालेपछि मध्यपूर्वको सुरक्षा अवस्थाबारे नयाँ चिन्ता उत्पन्न भएको छ।
सीएनएनले अमेरिकी अधिकारीहरूलाई उद्धृत गर्दै जनाएअनुसार हालैका अमेरिकी तथा इजरायली आक्रमणपछि क्षति व्यहोरेको इरानले आफ्नो सैन्य औद्योगिक संरचना तीव्र गतिमा पुनर्निर्माण गरिरहेको छ। विशेषगरी तेहरानले पुनः ड्रोन उत्पादन सुरु गरिसकेको र रक्षा प्रणालीलाई छरिएका तथा भूमिगत संरचनामार्फत पुनर्संगठित गरिरहेको अमेरिकी विश्लेषणमा उल्लेख छ।
अमेरिकी गुप्तचर स्रोतहरूका अनुसार, इरानले निगरानी तथा आक्रमण क्षमतायुक्त ‘शाहेद’ श्रृंखलाका ड्रोनहरू पुनः उत्पादनमा ल्याइसकेको छ। वासिङ्टनले यसलाई गम्भीर रणनीतिक चुनौतीका रूपमा लिएको बताइएको छ।
रिपोर्टमा इरानले सैन्य उत्पादन प्रणालीलाई केन्द्रीकृत नगरी विभिन्न स्थानमा विभाजित रूपमा सञ्चालन गर्ने रणनीति अपनाएकाले पूर्ण रूपमा निष्क्रिय पार्न कठिन भएको उल्लेख गरिएको छ। अमेरिकी विश्लेषकहरूको निष्कर्षमा हालैका प्रहारहरूले केही समय असर पारे पनि इरानको दीर्घकालीन सैन्य उत्पादन क्षमतालाई कमजोर बनाउन नसकेको उल्लेख छ।
यसैबीच अमेरिकी अधिकारीहरूले इरानको पुनर्निर्माणमा रुस र चीनसँगको सम्भावित प्राविधिक तथा सैन्य सहयोगमाथि पनि चासो व्यक्त गरेका छन्। इरानले पुनः ड्रोन र मिसाइल उत्पादन तीव्र बनाए मध्यपूर्वमा नयाँ सुरक्षा संकट निम्तिन सक्ने चेतावनी विश्लेषकहरूले दिएका छन्।
यमन, लेबनान, सिरिया र इराकमा रहेका इरान समर्थित समूहहरूलाई भविष्यमा थप सैन्य सामग्री उपलब्ध गराइने सम्भावनाले पनि पश्चिमी शक्तिहरूलाई थप चिन्तित बनाएको छ।
इरानको तीव्र सैन्य पुनर्संरचनाले अमेरिकी राष्ट्रपति डोनाल्ड ट्रम्प प्रशासनमाथि नयाँ रणनीतिक दबाब सिर्जना गरेको सीएनएनले जनाएको छ। वासिङ्टनमा अहिले इरानमाथि थप प्रतिबन्ध, कडा दबाब वा पुनः सैन्य विकल्पबारे बहस चर्किएको बताइएको छ।
यद्यपि केही अमेरिकी अधिकारीहरूले केवल सैन्य आक्रमणले इरानको दीर्घकालीन रक्षा क्षमता समाप्त गर्न नसकिने भन्दै कूटनीतिक समाधानलाई पनि समान प्राथमिकतामा राख्नुपर्ने धारणा व्यक्त गरेका छन्।
