पोखरा,३० जेठ। सामाजिक सञ्जाल प्लेटफर्म फेसबुक, इन्स्टाग्राम र मेसेन्जरमा शुक्रबार विश्वव्यापी रूपमा प्राविधिक समस्या देखिएपछि लाखौं प्रयोगकर्ता प्रभावित भएका छन्। केही घण्टासम्म सेवा अवरुद्ध हुँदा प्रयोगकर्ताहरूले लगइन गर्न, पोस्ट हेर्न, सामग्री अपलोड गर्न तथा सन्देश आदानप्रदान गर्न कठिनाइ भोगेका थिए।
विश्वका विभिन्न देशका प्रयोगकर्ताहरूले एकै समयमा फेसबुक र इन्स्टाग्राम नचल्ने, अकाउन्ट स्वतः लगआउट हुने, पेज रिफ्रेस नहुने तथा मेसेन्जरमार्फत सन्देश पठाउन नसकिने समस्या सामाजिक सञ्जाल तथा सेवा निगरानी प्लेटफर्महरूमा रिपोर्ट गरेका थिए।
सामाजिक सञ्जाल कम्पनी मेटाले समस्या देखिएलगत्तै प्राविधिक टोली परिचालन गरेको जनाएको थियो। कम्पनीका अनुसार प्रणालीमा आएको प्राविधिक गडबडीका कारण सेवा प्रभावित भएको भए पनि केही घण्टाको प्रयासपछि अधिकांश सेवा पुनः सामान्य अवस्थामा फर्काइएको छ।
यस अवरोधले व्यक्तिगत प्रयोगकर्तामात्र नभई फेसबुक र इन्स्टाग्राममार्फत व्यवसाय सञ्चालन गर्ने उद्यमी, डिजिटल मार्केटिङ क्षेत्रमा आबद्ध व्यक्ति तथा सामग्री उत्पादकहरूलाई समेत असर पुर्याएको थियो। धेरै व्यवसायले ग्राहकसँगको सम्पर्क र प्रचारप्रसारमा असहजता व्यहोरेका थिए।
नेपालसहित एशिया, युरोप, अमेरिका र अन्य क्षेत्रका प्रयोगकर्ताहरूले एकैसाथ समस्या भोगेकाले यो अवरोध विश्वव्यापी प्रकृतिको रहेको देखिएको छ। यद्यपि समस्या उत्पन्न हुनुको ठोस कारणबारे कम्पनीले विस्तृत विवरण सार्वजनिक गरेको छैन।
पछिल्ला वर्षहरूमा पनि मेटाका विभिन्न प्लेटफर्महरूमा यस्ता प्राविधिक अवरोध पटक–पटक देखिँदै आएका छन्। सञ्चार, व्यवसाय, सूचना आदानप्रदान र डिजिटल सेवाका लागि सामाजिक सञ्जालमा बढ्दो निर्भरताका बीच यस्ता अवरोधले विश्वव्यापी रूपमा ठूलो प्रभाव पार्न सक्ने तथ्य पुनः उजागर भएको छ।
हाल फेसबुक, इन्स्टाग्राम र मेसेन्जरका सेवा सामान्य रूपमा सञ्चालनमा रहेको जनाइएको छ।
