सत्तारुढ काँग्रेस र प्रमुख प्रतिपक्षी एमालेबीच अमेरिकी सहायताको एमसीसी परियोजना संसदबाट अनुमोदन गर्नेविषयमा सहमति भएको छ ।प्रधानमन्त्री निवास बालुवाटारमा राति अबेर सम्पन्न दुई दलका शीर्ष नेताको छलफलमा एमसीसीसहित राष्ट्रिय राजनीतिक एजेण्डामा सहमतिका साथ अघि बढ्ने सहमति भएको छ ।
सत्ता साझेदार माओवादी केन्द्र, नेकपा एकीकृत समाजवादी, जनता समाजवादी र राष्ट्रिय जनमोर्चाले एमसीसी अनुमोदनमा साथ नदिने स्पष्ट भएपछि प्रधानमन्त्री शेरबहादुर देउवाले एमालेसँग हात अघि बढाएका हुन् ।
एमालेले एमसीसी अनुमोदन गर्न (एकीकृत समाजवादीका माधव नेपालसहित १४ सांसदमाथि कारबाही हुनुपर्ने, सभामुख अग्नि सापकोटाविरुद्ध महाअभियोग प्रस्ताव लगाइनुपर्ने, प्रधानन्यायाधीश चोलेन्द्रशमशेर राणाविरुद्धकोमहाअभियोग प्रस्ताव फिर्ता लिनुपर्ने, ७ मध्ये ३ वटा प्रदेश सरकारको नेतृत्व आफूले पाउनुपर्ने लगायत सर्त अघिसारेको छ ।
एमालेको सबै मागमा प्रधानमन्त्री शेरबहादुर देउवासहित काँग्रेस नेताहरु करिब सहमत भएका छन् । बैठकपछि सरकारका प्रवक्तासमेत रहेका सञ्चारमन्त्री ज्ञानेन्द्रबाहदुर कार्कीले दुई दलबीचको छलफल सकारात्मक रहेको प्रतिक्रिया दिए । उनले एमालेले संसदमा जारी राखेको अवरोध हटाउने र एमसीसी अनुमोदन गर्ने विषयमा करिब सहमतिनजिक पुगिएको बताए ।
कार्कीले शुक्रबारको संसद बैठकअघि पुनः दुई दलका शीर्ष नेतृत्वबीच छलफल हुने जानकारी दिए ।
