गाेरखा । नेपाल कम्युनिष्ट पार्टी माओवादी केन्द्रका अध्यक्ष पुष्पकमल दाहाल ‘प्रचण्ड’ मतदाता भेटघाटका लागि आज गाेरखा आइपुगेका छन् । प्रचण्डले आज गाेरखा नगरपालिकाका विभिन्न वडाका नागरिकहरुसँग भेटघाट गर्ने कार्यक्रम रहेकाे माओवादी नेता लेख बहादुर थापा मगरले जानकारी दिए ।
प्रचण्ड आज गाेरखा नगरपालिका वडा नम्बर १४ बाट प्रवेश गरी आजै दिउँसाे गाेरखा दरबार सँग्रहालय परिसरमा प्रेस सेन्टर नेपालले गर्ने पत्रकार सम्मेलनमा भाग लिने कार्यक्रम रहेकाे गठबन्धन जिताऔँ अभियानका प्रेस कमाण्डर राजेन्द्र न्याैपानेले बताए ।
गाेरखा निर्वाचन क्षेत्र नम्बर २ मा प्रचण्डले उम्मेदवारी दिएका छन् । प्रचण्डकाे उम्मेदवारीसँग गाेरखाकाे निर्वाचनमा देशैभरीका नागरिकहरुकाे ध्यान केन्द्रिकृत भएकाे छ ।
जीवनकाे छाेटाे कार्यकालमा नै नेपाली राजनीतिमा नयाँ नयाँ प्रयाेग गर्दै आएका प्रचण्डकाे पछिल्लाे अभिव्यक्ति समृद्धि र सुशासनकाे रहेकाे छ । प्रचण्डकाे पछिल्ला गतिविधि आर्थिक क्षेत्रकाे वृहत परिवर्तन गर्ने देखिएकाले नेपाल नयाँ युगमा प्रवेश गर्न लागेकाे नागरिक सन्त बहादुर गुरुङले बताएका छन् ।
