गोरखा, ८ भाद्र । गोरखाको भिमसेनथापा गाउँपालिकाले संघीय मामिला तथा सामान्य प्रशासन मन्त्रालयद्वारा सार्वजनिक गरिएको संस्थागत क्षमता स्वमूल्याङ्कनको नतिजामा ऐतिहासिक सफलता हात पारेको छ। सेवा प्रवाह, सुशासन, पारदर्शिता, विकास निर्माण र नागरिकमैत्री कार्यशैलीलाई आधार मानेर गरिएको मूल्याङ्कनमा यस गाउँपालिकाले ८७.७५ अंक प्राप्त गर्दै गण्डकी प्रदेशमै तेस्रो र गोरखा जिल्लामा पहिलो स्थान हासिल गरेको हो।
गाउँपालिका अध्यक्ष लोकप्रसाद बञ्जाराले यो उपलब्धिलाई आकस्मिक नभई योजनाबद्ध परिश्रमको नतिजा बताउनुभयो। उहाँले भन्नुभयो, “यस गौरवको श्रेय सम्पूर्ण गाउँवासी, जनप्रतिनिधि, कर्मचारी, सेवा उपयोगकर्ता र सरोकारवालालाई जान्छ। हामी सबैको सामूहिक प्रतिबद्धताले नै भिमसेनथापा गाउँपालिकालाई प्रदेशमै उत्कृष्टताको यो तहमा पुर्याएको हो।”
संघीय मन्त्रालयले स्थानीय तहको मूल्याङ्कनका लागि १० सूचक तय गरेको थियो, जसमा सेवा प्रवाहको गुणस्तर, विकास–निर्माणको प्रभावकारिता, आर्थिक व्यवस्थापन, सामाजिक समावेशीकरण, सुशासन र पारदर्शिता, नागरिक सहभागिता लगायतका मापदण्ड समावेश थिए।
यद्यपि उच्च अंक प्राप्त गर्दै अग्रस्थानमा पुगे पनि गाउँपालिकासमक्ष चुनौतीहरू पहाडहरु अझै बाँकी छन्। ग्रामीण पूर्वाधार, स्वास्थ्य सेवा विस्तार, किसानलाई मल बिको र रोजगारी सिर्जनाजस्ता क्षेत्रमा थप लगानी आवश्यक रहेको सरोकारवालाहरू बताउँछन्। अध्यक्ष बञ्जाराले पनि आगामी दिनमा अझ प्रभावकारी सेवा प्रवाह, दिगो विकास र सुशासनलाई निरन्तरता दिने प्रतिबद्धता व्यक्त गर्नुभयो।
नागरिक पक्षबाट पनि यो उपलब्धिलाई स्वागत गरिएको छ। स्थानीय बासिन्दा अस्मिता पाण्डे भन्छिन्, “यसअघि धेरै काम फाइलमै सीमित हुन्थे, अहिले केही परिवर्तन देखिएको छ। अझ स्वास्थ्य र शिक्षा क्षेत्रमा पनि गति बढाइदिए स्थानीयलाई अझ लाभ हुनेछ।”
भिमसेनथापा गाउँपालिकाले देखाएको प्रगति केवल संस्थागत गौरव मात्र नभई सम्पूर्ण पालिकावासीको सामूहिक प्रयास र सहभागिताको परिणाम मानिएको छ। यसले स्थानीय तह सुदृढीकरण र जनतामुखी शासन प्रणालीतर्फको नयाँ मापदण्ड स्थापित गरेको विश्लेषकहरूको मत छ।
