चुनबाङबाट प्रचण्डको उद्‍घोष: ‘आगोको राजनीति पराजित हुन्छ, गणतन्त्रको पक्ष विजयी हुन्छ’

रुकुम पूर्व।नेपाली कम्युनिष्ट आन्दोलनका शीर्ष नेता तथा नेकपाका संयोजक प्रचण्डले प्रतिनिधिसभा निर्वाचनलाई परिवर्तन र प्रतिगमनबीचको निर्णायक संघर्षका रूपमा व्याख्या गर्दै आगजनी, अराजकता र कुशासनको राजनीति गर्ने शक्तिहरू पराजित हुने दाबी गर्नुभएको छ।
चुनबाङमा आयोजित जनभेटघाट कार्यक्रममा सम्बोधन गर्दै उहाँले “आगो लगाउने र ध्वंस मच्चाउनेहरू हार्नेछन्, गणतन्त्र र परिवर्तन ल्याउनेहरू जित्नेछन्” भन्ने उद्घोष गर्नुभयो। उहाँले हालैको बंगालदेशको निर्वाचनलाई उदाहरण दिँदै हल्ला र उग्र नाराभन्दा स्थिरता, एजेन्डा र जनविश्वासले नै अन्ततः विजय हासिल गर्ने तर्क गर्नुभयो।
प्रचण्डले रोल्पा–रुकुम क्षेत्रका जनताले हिंसा र दमनको राजनीति नजिकबाट भोगेकाले अब विकास, सुशासन र समाजवादतर्फ उन्मुख नेतृत्व रोज्ने विश्वास व्यक्त गर्नुभयो। उहाँले रुकुम पूर्वलाई विकास र समाजवादको नमुना क्षेत्रका रूपमा अघि बढाउने प्रतिबद्धता जनाउँदै निर्वाचन परिणामले देशको राजनीतिक दिशा स्पष्ट पार्ने बताउनुभयो।
उहाँको अभिव्यक्तिले रुकुम पूर्वमा चुनावी माहोल थप तातेको छ।