काठमाडौं । माछापुच्छ्रे बैंक लिमिटेड ले चालु आर्थिक वर्षको तेस्रो त्रैमाससम्मको अपरिष्कृत वित्तीय विवरण सार्वजनिक गर्दै उल्लेखनीय वित्तीय सुधार देखाएको छ। बैंकको खुद नाफा मात्र होइन, प्रतिशेयर आम्दानी (EPS) समेत उल्लेख्य रूपमा वृद्धि भएको छ।
समीक्षा अवधिसम्म बैंकले १ अर्ब ६५ करोड ८६ लाख रुपैयाँ खुद नाफा आर्जन गरेको छ, जुन गत आर्थिक वर्षको सोही अवधिको १ अर्ब १० करोड २६ लाख रुपैयाँ को तुलनामा ५०.४३ प्रतिशतले बढी हो। नाफामा आएको यो उछालले बैंकको सञ्चालन दक्षता र आम्दानी संरचनामा सुधार भएको संकेत गर्छ।
बैंकको खुद ब्याज आम्दानी पनि वृद्धि भएर ४ अर्ब ३९ करोड ८३ लाख रुपैयाँ पुगेको छ, जुन अघिल्लो वर्षको तुलनामा ३.४७ प्रतिशतले बढी हो। यस्तै, कुल सञ्चालन आम्दानी ९.९३ प्रतिशत र सञ्चालन मुनाफा १६.६४ प्रतिशतले वृद्धि भएको छ।
समीक्षा अवधिमा बैंकको वितरणयोग्य मुनाफा ७६ करोड २२ लाख रुपैयाँ रहेको छ, जसले आगामी लाभांश क्षमतामा सकारात्मक संकेत दिन्छ।
बैंकले ३ अर्ब रुपैयाँ बराबरको अविमोच्य असञ्चिति अग्राधिकार शेयर जारी गर्दै आफ्नो चुक्ता पूँजी १५ अर्ब ८ करोड रुपैयाँ पुर्याएको छ। हाल बैंकको जगेडा कोषमा ८ अर्ब २२ करोड रुपैयाँ सञ्चित छ।
निक्षेप र कर्जा विस्तारतर्फ पनि बैंक सक्रिय देखिएको छ। चैत मसान्तसम्म बैंकले २ खर्ब १३ अर्ब रुपैयाँ निक्षेप संकलन गर्दै १ खर्ब ५९ अर्ब रुपैयाँ कर्जा प्रवाह गरेको छ।
प्रतिशेयर आम्दानी कति पुग्यो?
नाफामा आएको वृद्धिसँगै बैंकको प्रतिशेयर आम्दानी (EPS) ६ रुपैयाँ १४ पैसा बढेर १८ रुपैयाँ ३० पैसा पुगेको छ। साथै, बैंकको प्रतिशेयर नेटवर्थ १६८ रुपैयाँ १० पैसा रहेको छ भने मूल्य आम्दानी अनुपात (P/E Ratio) १३.७७ गुणा कायम भएको छ।
समग्रमा, माछापुच्छ्रे बैंकको वित्तीय सूचकहरू सुदृढ देखिएका छन्, जसले बैंकलाई लगानीकर्तामाझ थप आकर्षक बनाउने संकेत गरेको छ
