पोखरा। नेकपा माओवादी केन्द्रका अध्यक्ष प्रचण्डले अमेरिकाले अघि सारेको स्टेट पार्टनरशीप कार्यक्रममा कुनै पनि किसिमको सम्झौता नहुने स्पष्ट पारेका छन् ।

शहीद रित बहादुर खडकाको स्मृति दिवसका अवसरमा सम्बोधन गर्दै अध्यक्ष प्रचण्डले राष्ट्रवादको झूठो र पाखण्डी प्रचार गर्नेहरुले यसबारेमा भ्रम छरेको बताए ।

“अहिले फेरी एकचोटी कुनै न कुनै रुपले फेरी राष्ट्रवादको झूठो र पाखण्डी प्रचार गर्ने कसरत भएकाे छ । विगतमा पनि हामीले देखेको हो, जो सबैभन्दा बढी आत्मसमर्पण गर्नेतर्फ जान्छन् उनीहरुले नै राष्ट्रवादको बढी हावा दिने गरेको अनुभव नेपाली जनतालाई छ । हिजोआज पनि एसपिपी हुँदैछ रे भनेर भइ नै सकेको जस्तो गरी प्रचार गरिएको छ । त्यो बिल्कुल झूठो हो ।” उनले भने ।

प्रचण्डले अगाडि भने, “म गठबन्धनको एउटा नेताको हैसियतले प्रधानमन्त्री र गठबन्धनमा भएको छलफल अनुसार, त्यस्तो कुनै सम्झौता भएको छैन । त्यस्तो कुनै सैन्य सम्झौता हुने छैन भन्ने घोषणा म गर्न चाहन्छु । कुनै पनि हालतमा त्यस्तो हालतमा जान्न भनेर प्रधानमन्त्रीले पनि प्रतिबद्धता जनाउनुभएकाे छ ।”

केपी ओली सरकारले एसपिपीलाई कार्यान्वयनमा लैजान सहमति गरेको समेत प्रचण्डले खुलासा गरे । “बरु सन् २०१९ मा केपी ओली नेतृत्वको सरकारले एसपिपी कार्यान्वयन गर्ने काम गरिसकेको तथ्य इतिहासमा छ । उनले भने, यो कुरा हामी सबैले बुझ्नु जरुरी छ । यो गठबन्धन त्यस्तो कुरामा लाग्दैन । हामी नेपालको स्वाधीनता, विकास र समृद्धिको पक्षमा दृढतापूर्वक उभिन्छौं ।”

अध्यक्ष प्रचण्डले अहिले पनि अग्रगमन र प्रतिगमनविरुद्धको लडाई नै मुख्य भएकोमा जोड दिए । निर्वाचनमा कुन पार्टीले कति सीट जित्यो भन्ने कुरा मुख्य नभएको उनले बताए ।

“यो निर्वाचन हाम्रा लागि, मेरा लागि कुन पार्टीले कति जित्यो भन्ने कुरा ठूलो होइन । ठूलो कुरा निर्वाचन यही संविधान अन्तर्गत सफलतापूर्वक सम्पन्न भयो, यसमा हामीले गर्व गर्नुपर्छ । संविधान च्यातेर अराजकता र निरंकुशताविरुद्ध लैजाने प्रवृत्ति परास्त भएको छ ।” उनले भने, “त्यसैले यो निर्वाचन हामीले जितेको हो । दलित, महिला, मधेसी प्रतिनिधित्व हुँदा जुन पार्टीबाट आएपनि त्यो हाम्रो जीत हो भन्ने ठान्छु । जुनसुकै पार्टीबाट आएको भएपनि त्यो हाम्रो लडाईको जीत हो । माओवादीले सबैभन्दा बढी रगत बगाएको नाताले हामीलाई गर्व लाग्छ ।”

सहकार्यमा जोड

राजनीतिक परिवर्तनको लडाईपछि अब समाजवाद निर्माणको लडाई, विकास र समृद्धिको लडाई, त्यसको निम्ति पनि हामीले सहकार्य र एकता गर्नु नै छ । जतिबेला हामी राजनीतिक दलहरु एकताबद्ध भयौं, त्यतिबेला ठूला ठूला परिवर्तनहरु नेपालमा सम्भव भएका छन् । ३० वर्षे पञ्चायती तानाशाहीलाई त्यतिबेला नेपाली कांग्रेस र वामपन्थीहरुको मोर्चाको बलमा परास्त गरियो । जनयुद्ध र जनआन्दोलनले एउटा परिवर्तन ल्याउने ठाउँमा १२ बुँदे समझदारी र विस्तृत शान्ति सम्झौता मार्फत सहमति, सहकार्य र एकताकै बलमा पुगेको हो । संविधान पनि त्यहि बलमा बनेको हो । अब विकास र समृद्धिको यात्रा पनि सहमति र सहकार्य कै तरिकाबाट लैजानुपर्छ । एक्लै अगाडि बढने अहंकार सबैले छोड्नुपर्छ ।

यो गठबन्धन ऐटितहासिक आवश्यकतामा जन्मियो । स्थानीय तहको निर्वाचन सफलतापूर्वक सम्पन्न भयो । अब प्रदेश र संघको निर्वाचनपनि सफलतासाथ सम्पन्न गर्नुछ । सहकार्यका साथ सम्पन्न गर्नुछ र परिवर्तनलाई उल्ट्याउन चाहने, प्रतिगमनतिर देशलाई लान चाहने, निरंकुशता र अराजकताको भूमरीमा देशलाई धकेल्न चाहने प्रवृत्तिलाई परास्त गर्नुछ । यो कुनै व्यक्तिका प्रति रिस र इविको कुरा होइन । एकता र सहकार्यको प्रवृत्ति देशमा हावी हुने कि निषेधात्मक दम्भ र अहंकारको प्रवृत्ति हावी हुने भन्ने लडाई चलिरहेको छ ।
त्यसैले हामीले रित बहादुर खडकाको स्मृति दिवस मनाउँदै गर्दा यो कुराको गहिरो आत्मसात गर्नु जरुरी छ । सहकार्यलाई अझ बलियो बनाउने, शान्ति प्रक्रियाका बाँकी काम पुरा गर्न गठबन्धन अझ बलियो बनाउने र विकास र समृद्धिका लागि राजनीतिक स्थायीत्वका लागि यो सहकार्य आवश्यक छ ।