गोरखा। काठमाण्डौँबाट गोरखा हुँदै सोतीका लागि छुटेको रात्रीबस आज बिहान दुर्घटना हुँदा पाँच जना गम्भिर घाईते भएका छन् ।
ग १ख ९४४६ नम्बरको बस भिमसेन थापा गाउँपालिका ३ तान्द्राङ मुरलीचोकमा दुर्घटना भएको ट्राफिक प्रहरी प्रमुख मित्रलाल ढकालले बताए ।
गोरखा धार्चे ६ का वर्ष ५० को सुरमान घले, भिमसेन थापा ३ बस्ने वर्ष २९ को उत्तम पुडासैनी, वर्ष ३० का मनोज पुडासैनी, उज्वल पुडासैनी र धार्चे स्थित केरौँजा बस्ने वर्ष ३२ को कान्छि गुरुङ रहेको प्रहरीले जनाएको छ ।
उनीहरुको टाउको र छात्तीमा चोट छ । गम्भिर घाईते तीन जनालाई काठमाण्डौँ र दुई जनालाई गोरखा अस्पतालमा उपचारका लागि लगिँदै छ ।
बसमा करिब ४० जना सवार रहेको र अन्यको अवस्था समान्य रहेको प्रहरीले जनाएको छ ।
बस सडकबाट करिब ५० मिटर तल खसेको ट्राफिक प्रमुख ढकालले बताए । चालक इलाका प्रहरी कार्यालय आरुघाटको नियन्त्रणमा छन् । दुर्घटनाको कारण भने खुल्न बाँकी छ ।
