पोखरा। कोरोना भाइरस विरुद्धको खोप निर्माण प्रयास गर्दै आएको एक अमेरिकी कम्पनीले आफुले बनाएको भ्याक्सिनले करिब ९५ प्रतिशत काम गर्ने दाबी गरेको छ ।
अमेरिकी औषधी उत्पादक कम्पनी मोडेर्नाले आफुहरुले बनाएको भ्याक्सिनले सोचेको भन्दा राम्रो नतिजा निस्केको दाबी गरेको छ । यद्यपी कम्पनीले औषधीको अन्तिम नतिजा आउन अझै केही महीना लाग्ने बताएको छ ।
कम्पनीले वसन्त ऋतुभन्दा पछि मात्रै यो भ्याक्सिन सार्वजनिक हुनसक्ने जनाएको छ ।
यसअघि अर्को औषधी उत्पादक कम्पनी फाइजरले आफूले उत्पादन गरेको भ्याक्सिनले ९० प्रतिशत प्रभावकारीता देखाएको दावी गरेको थियो । त्यसैगरि रसियन भ्याक्सिन कम्पनीले बनाएको भ्याक्सिनले ९२ प्रतिशत काम गरेको सार्वजनिक गरिएको थियो ।
मोडेर्नाको दाबी अनुसार कोरोना भ्याक्सिनमा उच्चतम सफलता प्राप्त गर्ने यो दोस्रो कम्पनी हो ।यसअघि फाइजरले बीयोनटेक सँग मिलेर ९० प्रतिशत प्रभावकारीता भएको भ्याक्सिन बनेको बताएको थियो ।
विश्वभर महामारीको रूप लिएको कोरोना भाइरस संक्रमणको भ्याक्सिन अन्य करिव १ सय वटा कम्पनीले पनि काम गरिरहेका छन् ।
त्यसमध्ये एक दर्जन बढी कम्पनीका उत्पादनहरू तेस्रो चरणमा किल्निकल ट्रायलमा रहेका छन् ।चौथो चरणमा ट्रायल पास भएपछि मात्र स्विकृत हुने हालसम्मका कुनैपनि भ्याक्सिनले काम गर्ने पुष्टि विश्वस्वास्थ्य संगठनले गरिसकेको छैन ।
